Blur estarán no Primavera Sound 2013

Notición. Se hai uns meses Blur presentaban dúas novas cancións no medio de rumores de separación ou descanso ('Non haberá máis Blur', chegou a asegurar Damon Albarn), agora a organización do Primavera Sound sorpréndenos confirmando a presenza da banda británica nas edicións portuguesa e catalá do festival como, presumiblemente, cabezas de cartaz. Nas últimas semanas víñase falando da posibilidade de que o Primavera Sound confirmase a un grupo de grande nivel e escoitábanse rumores dunha posible reunión de The Smiths, mais polo de agora Blur é a única banda confirmada.
O grupo actuará no Porto a noite do 31 de maio, mentres que a data en Barcelona será xusto unha semana antes, o venres 24. Estas datas son exclusivas para a península ibérica, é dicir, non haberá máis concertos de Blur en España ou Portugal no próximo ano.
O festival celebrarase no Porto entre o 30 de maio e o 2 de xuño e en Barcelona entre o 22 e o 26 de maio. O prezo dos abonamentos será de 80€ na versión portuguesa do festival e 145€ na catalá. Tendo en conta a volatilidade da formación, que atendendo ás declaracións dos seus membros ben podería desaparecer definitivamente dun día para outro, a data debería ser ineludible para os fans da banda, que estamos de noraboa.